اسلام آباد۔22جولائی (اے پی پی) وزیراعظم محمد شہبازشریف آکھیا جو ملک اچ سرمایہ کاری ودھاوݨ حکومت دی پہلی ترجیح اے، حکومت کاروبار دوست ماحول ݙیوݨ کیتے ہرممکن اقدامات کریندی پئی اے جڈانجو وزیراعظم وفاقی وزارتاں دی استعداد اتے سرمایہ کاری ودھاوݨ کیتے سٹیئرنگ کمیٹی ٻݨاوݨ دی ہدایت کیتی اے جئیں دی اڳواݨی او آپ کریسن۔ وزیراعظم آفس دے میڈیا ونگ توں جاری بیان موجب پاکستان اچ سرمایہ کاری ودھاوݨ اتے حکومتی اداریاں دی استعداد ودھاوݨ بارے وزیر اعظم محمد شہباز شریف دی صدارت اہم اجلاس تھیا۔ اجلاس کوں ݙسیا ڳئیا جو پبلک پرائیویٹ پارٹنرشپ اتھارٹی ولوں وفاقی وزارتاں دی استعداد ودھاوݨ اتے سرمایہ کاری ودھاوݨ بارے ماہرین دی خدمات ڳھنݨ کیتے کنسلٹنسی فرم کئیارنی (Kearney) دی خدمات حاصل کر ڳھدن۔ کئیارنی ہک بین الاقوامی شہرت یافتہ فرم اے جئیں دے آپریشنز پوری دنیا خصوصی طور مشرق وسطیٰ اچ ہن۔ وزیراعظم آکھیا جو ملک اچ سرمایہ کاری ودھاوݨ حکومت دی پہلی ترجیح اے۔ وزیراعظم وفاقی وزارتاں دی استعداد کار اتے سرمایہ کاری ودھاوݨ تے پیشرفت بارے اسٹیئرنگ کمیٹی ٻݨاوݨ دی ہدایت کیتی جئیں دی سربراہی وزیراعظم آپ کریسن۔ کئیارنی ولوں وزیراعظم کوں حکومت پاکستان نال جاری آپݨے مشاوری عمل دی حکمت عملی تے بریفنگ ݙیندیں ہوئیں ݙسیا جو کئیارنی ہݨ تئیں وفاقی حکومت دے 15 اداریاں نال مشاورت کر چکی اے۔ ایں مشاورتی عمل اچ 97 ترجیحی منصوبیاں دی نشاندہی کیتی ڳئی اے۔ بریفنگ اچ ݙسیا ڳئیا جو کئیارنی حکومت پاکستان نال مشاورت اچ پائیدار ترقی کیتے منصوبہ بندی دا لائحہ عمل ٻݨیسی۔ کئیارنی سرکاری اداریاں دا ریگولیٹری فریم ورک ٻہتر ٻݨاوݨ اتے سرمایہ کاراں کوں راغب کرݨ اتے ریاستی ملکیتی اداریاں دی نجکاری بارے حکومت پاکستان نال تعاون کریسن۔ اجلاس اچ وفاقی وزیر اقتصادی امور احد خان چیمہ،وفاقی وزیر خزانہ تے محصولات محمد اورنگزیب،وفاقی وزیر منصوبہ بندی احسن اقبال، وزیر مملکت برائے خزانہ علی پرویز ملک ، ڈپٹی چیئرمین پلاننگ کمیشن جہانزیب خان ، وزیراعظم دے کوآرڈینیٹر رانا احسان افضل ، اتے متعلقہ اعلیٰ سرکاری افسرشریک تھیے۔
.jpg)
