قومی اسمبلی دیاں حلقہ بندیاں دے ضمن اچ آئینی ترمیم دا مسودہ تیار (خمیس کوں ) قومی اسمبلی دے اجلاس اچ پیش کیتا ویسی
قومی اسمبلی دیاں 272 جنرل نشستاں برقرار رکھنڑ تے اتفاق، 7 لکھ 80 ہزار دی آبادی سانگے قومی اسمبلی دی ہک سیٹ ہوسی خیبرپختونخوا اچ قومی اسمبلی دیاں4 جنرل اتے ہک تریمت نشست دا ودھارا ،بلوچستان اچ ڈوجنرل اتے تریمت دی ہک سیٹ دا ودھارا ، وفاقی دارالحکومت اچ ہک سیٹ دا ودھارا کیتا ویسی ، قصور، اوکاڑہ، ساہیوال، اٹک، شیخوپورہ اتے پاک پتن اچ قومی اسمبلی دی ہک سیٹ گھٹ ، ڈیرہ غازی خان، راجن پور، مظفر گڑھ، لیہ، لاہور اچ ہک ہک سیٹ ودھ ویسی
اسلام آباد ۔ یکم نومبر (اے پی پی)نویں مردم شماری دے تحت قومی اسمبلی دیاں حلقہ بندیاں دے ضمن اچ آئینی ترمیم دا مسودہ تیار کر گھدا گیا ہے جیں جیں کوں اج خمیس کوں قومی اسمبلی دے اجلاس اچ پیش کر ڈتا ویسی ۔اے فیصلہ قومی اسمبلی اچ پارلیمانی قائدین دے اجلاس اچ کیتا گیا جیرھا جو بدھ کوں سپیکر قومی اسمبلی سردار ایاز صادق دی صدارت اچ تھیا ،اجلاس اچ وفاقی وزیرقانون زاہدحامد، وفاقی وزیرپارلیمانی امورشیخ آفتاب احمد، عوامی نیشنل پارٹی دے رہنماءحاجی غلام احمد بلور، جماعت اسلامی دے صاحبزادہ طارق اللہ، جمعیت علمائے اسلام (ف) دے اکرم خان درانی، مسلم لیگ (ف) دے غوث بخش مہر، پختونخواملی عوامی پارٹی دے محمودخان اچکزئی، پاکستان پیپلزپارٹی دے سید خورشید احمدشاہ اتے سید نویدقمر، متحدہ قومی موومنٹ دے ڈاکٹر فاروق ستار، پاکستان تحریک انصاف دے شاہ محمودقریشی، قومی وطن پارٹی دے سربراہ آفتاب احمدخان شیرپاﺅ سمیت سیکرٹری قانون، سیکرٹری الیکشن کمیشن بابریعقوب، چیئرمین نادرا، ادارہ شماریات پاکستان دے افسراں تے بئے متعلقہ حکام شرکت کیتی ۔اجلاس دے دوران الیکشن کمیشن تے نادرا دے حکام شرکا کوں مطلوبہ اعداد شمار پیش کیتے تے پارلیمانی قائدین کوں نویاں حلقہ بندیاں بارے تفصیلی بریفنگ ڈتی گی ۔اجلاس دے بعد میڈیا نال گالھ مہاڑ کریندے ہوئیں سپیکرقومی اسمبلی آکھیا جو نویاں حلقہ بندیاں متعلق مسودہ قانون کوں چھیکڑی شکل ڈے ڈتی گی ہے جیں کوں قومی اسمبلی دے اجلاس اچ پیش کیتا ویسی بعد اچ سینیٹ توں ایندی منظوری گھدی ویسی ۔انہاں آکھیا جو ہک ڈینھ پہلے وی اجلاس اچ قومی اسمبلی دیاں 272جنرل سیٹاں برقرار رکھنڑ تے اتفاق کیتا گیا اج ایں معاملے تے مزید مشاورت کیتی گی ہے تے مسودہ قانون کوں چھیکڑی شکل ڈے ڈتی گی ہے ۔انہاں آکھیا جو نویاں حلقہ بندیاں دے تحت خیبرپختونخوا اچ قومی اسمبلی دیاں4 جنرل اتے ہک تریمت سیٹ دا ودھارا ہوسی ، صوبے اچ قومی اسمبلی دیاں 39 جنرل اتے تریمتاں دیاں 9 مخصوص سیٹا ں ہوسن تے خیبر پختونخوا اچ قومی اسمبلی دیاں کل سیٹاں دی تعداد48 ہوسی۔ انہاںآکھیا جو بلوچستان اچ ڈوجنرل اتے تریمت دی ہک سیٹ دا ودھار ا تھیسی تے صوبے اچ قومی اسمبلی دی سیٹ دی کل تعداد 20 ہوسی۔ وفاق دے زیر انتظام قبائلی علاقہ جات اتے سندھ دیاں سیٹاں اچ کوئی تبدیلی کائنی۔ سپیکرقومی اسمبلی ڈسایا جو وفاقی دارالحکومت اچ قومی اسمبلی دی ہک سیٹ دا ودھارا کیتا ویسی ،اسلام آباد توں ہنڑ قومی اسمبلی دیاں ترائے سیٹا ں ہوسن ۔اینویں مجموعی جنرل سیٹاں دی تعدا د272 اتے 60 مخصوص سیٹاں دے بعد اے تعداد332 ہوسی۔ انہاںآکھیا جوقومی اسمبلی دیاں سیٹاں دی تعداد اچ ودھارا آبادی دی بنیاد تے ہوسی ، 7 لکھ 80 ہزاردی آبادی سانگے قومی اسمبلی دی ہک سیٹ ہوسی ۔ انہاں آکھیا جو اے سلسلہ این اے ون توں شروع تھیسی ، ایں اچ مارجن آف ایرر پلس مائنس 10 تھی سگدا ہے۔ہک سوال تے انہاں آکھیا جو حلقہ بندیاں متعلق ساریاں سیاسی جماعتاں دا اتفاق رائے موجود ہے، الیکشن کمیشن اپنڑاں پراسیس شروع کر ڈتاہے تے ایں ضمن اچ او ودھ تفصیلی طور تے ڈسا ڈیسن ۔پاکستان تحریک انصاف دے رہنماءشاہ محمود قریشی ایں موقع تے میڈیا نال گالھ مہاڑ کریندے ہوئیں آکھیا جو نویاں حلقہ بندیاں نال قصور، اوکاڑہ، ساہیوال، اٹک، شیخوپورہ اتے پاک پتن دے ضلعے اچ قومی اسمبلی دی ہک ہک سیٹ گھٹ جڈاں جو ڈیرہ غازی خان، راجن پور، مظفر گڑھ، لیہ، لاہور دے ضلعے اچ قومی اسمبلی دی ہک ہک سیٹ ودھ ویسی ۔
