سمر قند۔16ستمبر (اے پی پی):پاکستان تے آذربائیجان ݙوہیں ملکاں وچال سیاسی، اقتصادی، توانائی، دفاع، تعلیم اتے عوامی سطح تے رابطے سودھے مختلف شعبیں اچ ݙوپاسے تعاون ودھاوݨ دا عزم کیتے ۔وزیراعظم آفس دے میڈیاونگ توں جاری بیان موجب وزیراعظم محمد شہبازشریف جمعہ کوں سمرقند اچ شنگھائی تعاون تنظیم دے سربراہان مملکت دے اجلاس دے موقع تے آذربائیجان دے صدر الہام علیوف نال ملاقات کیتی ۔ وزیراعظم ایں موقع تے پاکستان نال تعاون اتے یکجہتی دے نال نال سیلاب توں متاثرہ لوکاں کیتے دل کھول تے مالی امداد ݙیوݨ تے آذربائیجان دا شکریہ ادا کیتے۔ انہاں آکھیے جو پاکستان کوں پیش آئی اے قدرتی آفت ماحولیاتی تبدیلیاں پاروں اے ، ایں عالمی خطرے نال نبݨݨ کیتے بین الاقوامی برادری فوری اقدامات چاوے ۔ وزیراعظم آکھیے جو پاکستان تے آذربائیجان وچال مثالی تعلقات ہن جیڑھے جو مشترکہ تاریخ، عقیدے اتے ثقافت نال جڑیے پئن ۔ وزیراعظم نگورنو کاراباخ تے پاکستان دی طرفوں آذربائیجان دی اصولی حمایت دا اعادہ کریندے ہوئیں ایندے مقبوضہ علاقیں کوں آزاد کراوݨ اچ تاریخی کامیابی تے مبارخ ݙتی اے ۔ وزیراعظم آرمینیا دے بلااشتعال حملے اچ 71 آذری فوجیاں دی اڄوکی شہادت تے وی تعزیت کیتی ۔وزیر اعظم بین الاقوامی قانون دے مطابق اتے ایندی علاقائی سالمیت دے تحفظ اچ آذربائیجان دے آپݨے دفاع دے حق دی حمایت دا اعادہ کیتے ، آپݨے ݙو طرفہ تعلقات دا جائزہ گھندے ہوئیں ݙوہیں رہنماواں سیاسی، اقتصادی، توانائی، دفاع، تعلیم اتے عوام نال عوام دی سطح تے رابطے سودھے مختلف شعبیں اچ ݙوپاسے تعاون ودھاوݨ دے عزم دا اعادہ کیتے ، وزیراعظم تجارت، سرمایہ کاری، زراعت، انفارمیشن ٹیکنالوجی اتے سیاحت دے شعبیں اچ ݙو پاسے تعلقات دی موجودہ صلاحیت کوں ودھاوݨ دی اہمیت تے زور ݙتے ۔ وزیراعظم آذربائیجان دے صدر کوں دورہ پاکستان دی دعوت ݙتی ۔صدر الہام علیوف وزیراعظم کوں وختی آذربائیجان دے دورے دی دعوت وی ݙتی۔
