اسلام آباد۔19نومبر (اے پی پی) وفاقی وزیر برائے منصوبہ بندی ترقی واصلاحات وخصوصی اقدامات پروفیسر احسن اقبال آکھیا جو تعلیمی نظام کوں جدید ٻݨاوݨ نہ صرف ویلھے دی لوڑھ اے بلکہ اساݙی آندی نسلاں دی کامیابی کیتے بنیادی شرط اے۔ تختی توں ٹیکنالوجی تئیں دا پندھ اساݙی تعلیم دے ارتقاء دی عکاسی کریندے۔ اے ڳالھیں انہاں منگل کوں انٹر بورڈ کوآرڈینیشن کمیشن ولوں تھیوݨ آلے ماڈل ایسسمنٹ فریم ورک دی لانچنگ تقریب توں خطاب کریندیں ہوئیں آکھی۔ انہاں آکھیا جو اڄ دا دور علم تے معیشت دا اے جتھ ٹیکنالوجی، تخلیقی صلاحیتاں اتے جدید مہارتاں نینگراں کیتے عالمی معیشت اچ مقام حاصل کرݨ دے بنیادی عناصر ہن۔ انہاں آکھیا جو وژن 2025 دے تحت وزارت تعلیم کوں نصاب اتے امتحانی نظام دی اصلاح دے منصوبے ݙتے ڳئن۔ استادیں دی تربیت دے بغیر معیاری تعلیم دا خواب پورا نی تھی سڳدا۔ اسلام آباد اچ عالمی معیار دا ٹیچر ٹریننگ ادارہ ٻݨایا ویسی۔ انہاں آکھیا جوڈسٹرکٹ ایجوکیشن رپورٹ دے مطابق 134 ضلعیاں اچوں ہک وی ضلع اعلی تعلیمی معیار تے پورا نی لہندا۔ تعلیمی نظام کوں جدید ٻݨاوݨ نہ صرف ویلھے دی لوڑھ اے بلکہ اساݙی آندی نسلاں دی کامیابی کیتے بنیادی شرط اے۔
