اسلام آباد۔21اگست (اے پی پی) پاکستان اتے سعودی عرب وچال پروازاں ودھاوݨ نال خرچے ڳھٹ کرݨ اتے پاکستانی حج تے عمرہ زائرین کوں ودھ توں ودھ سہولت ݙیوݨ تے اتفاق کیتا ڳئیا جڈانجو سعودی وزیر حج ڈاکٹر توفیق بن فوزان الربیعہ آکھیا جو روڈ ٹو مکہ پراجیکٹ کوں ٻئے ہوائی اݙیاں تئیں ودھاوݨ کیتے اقدامات کیتے ویسن۔ عمرہ زائرین دے ویزہ دی مدت ودھا تے 90 دن کر ݙتی ڳئی اے، پاکستانی عمرہ زائرین سعودی عرب اچ کتھائیں وی ونڄ سڳسن۔ پاکستان دے حج کوٹہ ودھاوݨ بارے وی کم کیتا ویسی۔ سنوار کوں پاکستان دے دورے تے آئے سعودی وزیر حج ڈاکٹر توفیق بن فوزان الربیعہ اتے نگراں وزیر مذہبی امور انیق احمد سانجھی پریس کانفرنس توں خطاب کیتا۔ ایں موقع تے نگراں وزیر مذہبی امور انیق احمد سعودی وزیر حج اتے انہاں دے وفد دا خیر مقدم کریندیں ہوئیں آکھیا جو خادمین حرمین الشریفین شاہ سلمان بن عبدالعزیز اتے سعودی ولی عہد شہزادہ محمد بن سلمان پاکستان نال ٻہوں محبت کریندن۔ سعودی وزیر مذہبی امور دا اڄوکا دورہ وی ایں محبت دا ثبوت اے۔
