اسلام آباد۔9مئی (اے پی پی):وفاقی وزیر اطلاعات و نشریات عطاءاللہ تارڑ آکھیے پوری دنیا دیاں نظراں وزیراعظم شہباز شریف دے آندے دورہ چین تے ڄمیاں کھڑن، چین پاکستان دا ساریں توں وݙا تجارتی شراکت دار اے ، سی پیک دی بدولت چینی مصنوعات دی پاکستان تے پاکسانی مصنوعات دی چین دی مارکیٹاں تئیں رسائی اچ ودھارا تھئے ۔ اے ڳالھ انہاں پاکستان اچ چین دے سفیر جیانگ ژائی ڈانگ نال ملاقات اچ آکھی اے ۔ ایں موقع تے پاک چین تعلقات، سی پیک، پاکستانی معیشت دی بحالی سانڳے حکومتی اقدامات سودھے ٻئے اہم امورتے ڳالھ مہاڑ تھئی ۔ ملاقات اچ وزیراعظم شہباز شریف دے آندے دورہ چین تے وی تفصیلی ڳالھ مہاڑ تھئی۔وفاقی وزیر چینی سفیر کوں پاکستان اچ چینی شہریاں دی حفاظت سانڳے حکومتی اقدامات دا وی ݙسائے ۔ ملاقات اچ ݙوہیں ملکاں وچال اطلاعات اتے ثقافت دے شعبیں اچ تعاون ودھاوݨ تے اتفاق تھئے ۔ وفاقی وزیر اطلاعات آکھیے وزیراعظم دے آندے دورہ چین اچ چین دی نیوز ایجنسی ”شنہوا“ اتے ایسوسی ایٹڈ پریس آف پاکستان (اے پی پی) وچال خبراں دے تبادلے دے معاہدے تے وی دستخط تھیسں ۔ ݙوہیں فریقین ثقافتی اتے تعلیمی وفد دے تبادلیں کوں ودھارا ݙیوݨ تے اتفاق تے ھک ݙوجھے نال تعاون جاری رکھݨ دا عزم ظاہر کیتے۔
