اسلام آباد۔27اکتوبر(اے پی پی) نگراں وزیراعظم انوار الحق کاکڑ ذرائع ابلاغ دے جائز مطالبات حل کرݨ دی ہدایت کریندے ہوئیں آکھیے حکومت آزادی اظہار تے مکمل یقین رکھیندی اے ، میڈیا ریاست دا وݙا تے اہم ستون اے، میڈیا تنظیماں کوں پیش آندے مسئلیں دے حل سانڳے ضروری اقدامات کیتے ویسن ۔ اے ڳالھ انہاں نگراں وفاقی وزیر اطلاعات مرتضیٰ سولنگی نال ملاقات اچ آکھی اے ۔ملاقات اچ وفاقی سیکرٹری اطلاعات ظہور احمد، پرنسپل انفارمیشن آفیسر طارق محمود خان اتے منیجنگ ڈائریکٹر اے پی پی محمد عاصم کھچی وی موجود ہن۔ وزیراعظم میڈیا آفس توں جاری بیان موجب ملاقات اچ اے پی این ایس، سی پی این ای، اخباری صنعت دے مسئلیں سودھے ٻئے اہم امور تے ڳالھ مہاڑ کیتی ڳئی ۔وزیراعظم ہدایت کیتی جو ذرائع ابلاغ دے جائز مطالبات حل کیتے ونڄن ۔ وزیراعظم آکھیے میڈیا ریاست دا وݙا تے اہم ستون اے، حکومت آزادی اظہار تے مکمل یقین رکھیندی اے ،میڈیا تنظیماں نال ملاقاتاں دا سلسلہ جاری رہسی تے انہاں دے مسئلے مکاوݨ سانڳے اقدامات کیتے ویسن ۔
.jpg)
