اسلام آباد۔29ستمبر (اے پی پی) وزیراعظم محمد شہبازشریف موسم پالے اچ گیس دی متوقع طلب دے پیشِ نظر فوری لائحہ عمل بݨاوݨ دی ہدایت اچ آکھیے جو سابق حکومت کورونا دے ݙینھاں اچ عالمی منڈی اچ سستی گیس دا فیدہ نی چاتا ، وختی گیس مل نہ گھن تے ایں قوم دے نال ٻہوں وݙا ظلم کیتے ، گزریل حکومت دے وختی فیصلے نہ کرݨ دا خمیازہ اڄ پورا ملک اتے غریب آدمی بھوڳیندا پئے ، سابق حکومت وانڳوں کہیں وی قسم دی بد انتظامی اتے مجرمانہ غفلت برداشت نہ کریساں ۔ خمیس کوں وزیراعظم آفس دے میڈیاو نگ توں جاری بیان موجب اے ڳالھ وزیراعظم اپݨی زیرصدارت موسمِ پالے اچ گیس دی صورتحال تے پیشگی لائحہ عمل بݨاوݨ کیتے سݙیے ڳئے ہنگامی اجلاس اچ ڳالھ مہاڑ کریندے ہوئیں آکھی اے ، اجلاس کوں موسم پالے اچ متوقع طلب اتے رسد تے تفصیلی بریفنگ ݙتی ڳئی ۔ اجلاس کوں حکومت دی موجودہ حکمتِ عملی تے آندے مہینے گیس ݙیوݨ کیتے پلان تے وی بریفنگ ݙتی ڳئی۔ وزیرِ اعظم متعلقہ حکام کوں پیش کیتے ڳئے پلان کوں مزید بہتر کرݨ تے گھٹ و وسط مدتی لائحہ عمل کوں ترجیح ݙیوݨ دی ہدایت جاری کیتن ۔اجلاس اچ سابق وزیرِ اعظم شاہد خاقان عباسی، وفاقی وزیرِ خزانہ اسحاق ڈار، وزیرِ مملکت پیٹرولیم مصدق ملک، مشیر احد چیمہ اتے متعلقہ اعلی حکام شرکت کیتی۔ اجلاس اچ وزیرِ اعظم شہباز شریف پالے دا موسم آوݨ تے گیس دی متوقع طلب تے وختی لائحہ عمل بݨاوݨ دی ہدایت کیتی ،وزیراعظم آکھیے جو سابق حکومت کورونا دے ݙینھاں اچ عالمی منڈی اچ سستی گیس دا فیدہ نی چاتا ۔ موجودہ حکومت اعدادو شمار اتے خالی ڳالھیں دی بجائے عملی و سنجیدہ اقدامات تے یقین رکھیندی اے۔
